ഉച്ച

മഞ്ഞച്ചായമടിച്ച പള്ളിഗോ‍പുരത്തിനപ്പുറം ഹജാര്‍ മലനിരകള്‍
വരണ്ട തരിശൂഭൂമിയില്‍ അവിടെയെത്താനായി ഉച്ച നീണ്ടു കിടന്നു
എന്നിട്ടും എത്താനാവാതെ...
കുറ്റിച്ചെടികളും വലിയ പാറക്കൂട്ടങ്ങളും നിറഞ്ഞ ഈ തരിശില്‍
‍ഈ ഉച്ചയില്‍
ഞാനാരെന്നോര്‍ത്ത് അമ്പരന്നു.

കാത്തിരിപ്പിന്റെ നീളത്തിനു എന്നും ഉച്ചയുടെ മണമായിരുന്നു.
വെയിലില്‍ ഉരുകുന്ന ആസക്തികളുടെ,
വെള്ളമില്ലാതെ വലയുന്ന മോഹഭംഗങ്ങളുടെ...

ഒരു മറുവിളിക്കായുള്ള കാത്തിരിപ്പിന്റെ നേരം--

ദൂരം അറിയില്ല..
മലനിരകളിലേക്കു കാറോടിച്ചു പോയാലോ?

ജീവിതം ഒരു നിഴല്‍ യുദ്ധം പോലെ..
എന്റെ തന്നെ നിഴലിനോട്-
നിഴലെന്നു തോന്നുന്നതിനോട്.
എന്നോ തുടങ്ങിയ യുദ്ധം
സ്വയം തീര്‍ക്കേണ്ട യുദ്ധം.

കാഴ്ചയുടെ മാളികയില്‍
ജീവിത നിരാസം
നിറം മങ്ങിയ പട്ടുപാവാട
കുളിപ്പിന്നലിന്റെ താഴ്വര.
നിതാന്ത ജാഗ്രത തളം കെട്ടിയ
പിന്നാമ്പുറത്ത്
ഉച്ചയുടെ വറ്റാത്ത കാമം.
സൌന്ദര്യ ലഹരിയുടെ പാരായണ വിരാമം.